រាជរដ្ឋាភិបាល ចេញអនុក្រឹត្យ ផាកពិន័យ ចំពោះ ការជក់បារី
05-March-2016 | ដោយ មែន កំសត់
ភ្នំពេញ៖ បើតាម ប្រសាសន៍ របស់ ឯកឧត្តម ផៃ ស៊ីផាន អ្នកនាំពាក្យ ទីស្ដីការគណៈរដ្ឋមន្ត្រី សេចក្តីព្រាងអនុក្រឹត្យស្ដីពីការហាមជក់បារី នេះមាន គោលបំណងចូលរួមក្នុងការការពារសុខុមាលភាពរបស់ប្រជាពលរដ្ឋ ការពារនិងទប់ស្កាត់ការរងផ្សែងផលិតផលថ្នាំជក់ដែលបង្កឲ្យ មានហានិភ័យសុខភាពដល់អ្នកនៅជុំវិញនិងបរិស្ថាននិង កាត់បន្ថយការប្រើប្រាស់ផលិតផលថ្នាំជក់។
ឯកឧត្តម ផៃ ស៊ីផាន បន្តថា ៖ នៅក្នុងសេចក្តីព្រាងអនុក្រឹត្យនេះ ក៏មានចែងអំពីការផាកពិន័យកម្រិតស្រាលដល់ បុគ្គលដែលប្រព្រឹត្តល្មើសគឺ ២ម៉ឺនរៀលចំពោះអ្នកជក់បារី នៅកន្លែងហាមឃាត់និង៥ម៉ឺនរៀលចំពោះម្ចាស់ កន្លែងដែលមិនព្រមបិទសញ្ញាហាមជក់បារីឬនៅតែបន្តដាក់បង្ហាញចានគោះបារី។ លោកឲ្យដឹងថា នៅប្រទេសម៉ាឡេស៊ី មានការផាកពិន័យជាប្រាក់ចំនួន៣,០៣០ដុល្លា សម្រាប់អ្នកបំពាន ប្រទេសឥណ្ឌូនេស៊ី៥,៥៨៧ដុល្លា ប្រទេសប្រ៊ុយណេ ចំនួន៧៩០ដុល្លា ប្រទេសសិង្ហបុរីចំនួន៧៥៦ដុល្លា ប្រទេសមីយ៉ាន់ម៉ា ចំនួន១៥៧ ទៅ ៧៨០ដុល្លា ប្រទេសហ្វីលីពីន ចំនួន១១ទៅ ២៥៧ដុល្លា ប្រទេសថៃ៦ទៅ៦៥ដុល្លា និង ប្រទេសវៀតណាម៤ទៅ១៤ ដុល្លា ចំពោះការប្រព្រឹត្តលើ្មស។
កន្លែងសាធារណៈដែលត្រូវហាមការជក់បារីមានដូចជា គ្រឹះស្ថានឧត្តមសិក្សា កន្លែងសាធារណៈ គ្រឹះស្ថានសាសនា សួនកុមារ សារៈមន្ទីរ និង រមណីយដ្ឋានវប្បធម៌ប្រវត្តិសាស្ត្រជាដើម។
ឯកឧត្តម ផៃ ស៊ីផាន បានលើកពីរបាយការណ៍របស់ក្រសួងផែនការ ឆ្នាំ២០១៤ថា ៖អ្នកមិនជក់បារី ៦០ភាគរយ កំពុងស្រូបផ្សែងបារីពីគេ។ ទីកន្លែងដែលប្រជាពលរដ្ឋកម្ពុជាស្រូបផ្សែងបារីពីគេខ្ពស់ជាងគេគឺនៅភោជនីយដ្ឋាន/អាហារដ្ឋាន(៧៦ភាគរយ) នៅក្នុងអគារធ្វើការរបស់រដ្ឋ(៤៩ភាគរយ) និង នៅពេលធ្វើដំណើរការតាមមធ្យោបាយធ្វើដំណើរសាធារណៈ(៣៤ភាគរយ )៕
ចំនួនអ្នកទស្សនា
- ថ្ងៃនេះ3621
- ម្សិលមិញ10851
- សប្តាហ៍នេះ70141
- ខែនេះ185291
- ឆ្នាំនេះ185291
- សរុប20627747